Հարաբերական անդո՞րր փոթորկից առաջ
Ինչպես հայտնի է, ՀՀ արդարադատության նախարարը օրերս «Արմենտելին» հրավիրել էր 60-օրյա բանակցության, որին երեկվա դրությամբ դեռ ընկերությունը չէր պատասխանելՙ գլխավոր տնօրեն Ն. Յորղուլասի Հայաստանից բացակայելու պատճառաբանությամբ: Երեկ Դավիթ Հարությունյանը լրագրողներին պարզաբանեց. «Մեր հրավերին «Արմենտելը» դեռ չի պատասխանել: Ակնկալում ենք այսօր կամ վաղը պատասխան ստանալ»: Ըստ նախարարի, բանակցություններն անխուսափելի ենՙ նախատեսված չարաբաստիկ «60 ա» լիցենզիայով, այլ հարց է, թե ի՞նչ ուղղվածություն կունենան դրանք, կլինեն ապարդյո՞ւն, թե՞, այնուամենայնիվ, կհասնեն արդյունքի: Բանակցություններին կմասնակցեն երեք կողմերՙ 0TE-ն, «Արմենտելը» եւ ՀՀ-ն, չնայած լիցենզիան նախատեսում է միայն «Արմենտելի» հետ բանակցություններՙ լիցենզիայի մասով: Բայց քանի որ կառավարությունն ունի նաեւ վեճՙ բաժնետոմսերի վաճառքի պայմանագրի տիրույթում ներդրումների հետ կապված եւ բազմաթիվ այլ հարցեր, որոնք կապված են ՕTE-ի հետ, բանակցությունների սեղանի շուրջ կնստի նաեւ ՕTE-նՙ իբրեւ երրորդ կողմ: «Ինչո՞ւ է ուշանում համապատասխան հանձնաժողովի գնահատականը «Արմենտելի» ներդրումների վերաբերյալ» հարցին ի պատասխան պրն Հարությունյանը շեշտեց, որ ստուգումները բավական ծավալուն են, իսկ պատասխանատու հայտարարություններից առաջ պետք է ճշգրտել ամեն ինչ, թե չէ «ԱԺ ամբիոնից հայտարարություններ ենք անում, իսկ հետո պարզում, որ դրանք չէին համապատասխանում իրականությանը կամ կային որոշ չափազանցություններ»: Հանձնաժողովն այժմ վերստուգումներ է կատարում երեք մարզերում: «Ցանկացած հայտարարություն պետք է հիմնավորված լինի, որպեսզի կարողանանք ցանկացած ատյանում պաշտպանել», եզրափակեց արդարադատության նախարարըՙ կրկին հաստատելով, որ ՀՀ կառավարությունը վճռականորեն է տրամադրված եւ առաջիկա բանակցությունները լինելու են վերջնական: Կընդունի՞ «Արմենտելը» ՀՀ կառավարության նետած «ձեռնոցը» եւ ինչպիսի՞ զիջումների կգնա: Համենայն դեպս, դատելով ընկերության տնօրենիՙ վերջերս հունական «Ստատուս» ամսագրին տված հարցազրույցի հաճոյախոսություններից, փոխզիջումային եզրեր գտնելու պատրաստակամություն հունական կողմից կարծես թե կա:
Գ. Մ.