«Ազգ» օրաթերթի խմբագրությունը երեկվանից անհիմն հոսանքազրկված է, եւ այս համարը «ծնվել» է «խրամատային պայմաններում»ՙ «դվիժոկով»: Պատճառը պարզելու տնօրինության բոլոր ջանքերն անցան ապարդյուն: Երեւանի «Կենտրոն» էլցանցի տնօրենը տեղում չէր մինչեւ երեկո, իսկ տեղակալներն անջատումը վերագրում էին ինչ-որ 40 հազար դրամ պարտքին, այն պարագայում, երբ «Կենտրոն» էլցանցի ներկայացրած հաշիվները վճարված են: Չհամաձայնեցին նույնիսկ այն առաջարկին, որ ժամանակավոր միացվի էլեկտրականությունը, մինչեւ պարզվի իսկությունը: Չօգնեց նաեւ մանրամասն բացատրությունը, որ ոչ միայն հայաստանաբնակ ընթերցողն է զրկվում մամուլի միջոցից, այլեւ «Ազգը» կարդում են աշխարհի 60-ից ավելի երկրներումՙ չորս լեզուներով (ինտերնետ տարբերակով):
Այս ամենից մի բան պարզ էՙ բաշխիչ ցանցերը ՀՀ-ում պետք է սեփականաշնորհվեն, որպեսզի վերջնականապես բացառվի «մասնագետի» ոչ միայն հաշվիչին մատով կպնելու հնարավորությունը, այլեւ վերանա նման անտերությունը:
«ԱԶԳ» ՕՐԱԹԵՐԹԻ ՏՆՕՐԻՆՈՒԹՅՈՒՆ