Ադրբեջանի պաշտպանության նախարարությունը եւ պաշտոնական շրջանակներն առայժմ որեւէ ձեւով չեն մեկնաբանում թուրքական եւ ամերիկյան թերթերի այն հաղորդումները, թե Ադրբեջանի տարածքում ամերիկյան օդուժի թիկունքային ժամանակավոր հենակետ է բացվելու: Այս մասին տեղեկացնում է Կասպյան լրատվական գործակալությունը:
Մինչդեռ թուրքական աղբյուրները նշում են, որ նման թիկունքային հենակետն անհրաժեշտություն է Աֆղանստանի ռմբակոծումներին մասնակցող ամերիկյան մարտական եւ ռազմափոխադրական ինքնաթիռների համար: Խոսքն առաջին հերթին ամերիկյան ռազմօդանավերի լիցքավորման եւ տեխնիկական ստուգումների, ինչպես նաեւ անձնակազմերի պարենավորման եւ բուժսպասարկման մասին է: