ԵՐԵՎԱՆ, 26 ՆՈՅԵՄԲԵՐ, ԱՐՄԵՆՊՐԵՍ: «Ներկայումս մենք այնպիսի իրավիճակում ենք, որ ցանկացած հանդիպում իսկապես կարող է բեկումնային լինել ԼՂ հիմնախնդրի կարգավորման համար: Պետք է սպասել նախագահների առաջիկա հնարավոր հանդիպմանը, որը նախատեսվում է ԱՊՀ գագաթաժողովի ընթացքում, եւ եռանախագահների հաջորդ քայլերին. միայն դրանից հետո ավելի հստակ կարող ենք կողմնորոշվել, թե ինչպիսի քայլեր են լինելու», այսօր ԱԺ-ում ասաց ՀՀ արտգործնախարար Վարդան Օսկանյանը:
Արտգործնախարարը նշեց, որ առաջիկայում Բուխարեստում տեղի է ունենալու ԵԱՀԿ նախարարների հանդիպումը, որտեղ որոշ քննարկումներ կլինեն ԼՂ հիմնախնդրի կապակցությամբ: «Թե՚ նախագահների հանդիպումը Մոսկվայում, թե՚ ԵԱՀԿ նախարարների հանդիպումը, հնարավոր է, որ որոշ հստակեցում մտցնեն հարցի ապագա զարգացումներում», նշեց Վ. Օսկանյանը, 2002 թ. առաջին կիսամյակում ԼՂ հիմնախնդրի կարգավորման մասին լուրերը փոքր-ինչ լավատեսական համարելով: