Ինտերնետային ցանցով ստացված տեղեկության համաձայն, թուրքական կառավարությունը մտադիր է դատական գործ հարուցել կանադահայ հայտնի ռեժիսոր Ատոմ Եղոյանի դեմ: Թուրքական կողմը նրան մեղադրում է «ատելություն սերմանելու եւ թուրք ժողովրդին արատավորելու» մեջ: Ըստ «Թըրքիշ սթար» օրաթերթի, Հայկական ցեղասպանության մասին պատմող «Արարատ» ֆիլմը, որը մեծ աղմուկ է հանել, եւ որը ներկայացվելու է ինչպես Օսկարի մրցանակաբաշխությանն, այնպես էլ Կաննի փառատոնի բացմանը, պարունակում է «մտահոգիչ» տեսարաններ հայերի նկատմամբ թուրքերի գործած ոճրագործությունների վերաբերյալ: Թերթը նշում է, որ օրինական ճանապարհով հնարավոր չէր արգելել ֆիլմի նկարահանումը, որը ֆինանսավորում է «Միրամաքս» ֆիլմընկերությունը: Բայց Ֆրանսիայում, Կանադայում եւ ԱՄՆ-ում ցուցադրվելուց հետո անհրաժեշտ է դատական գործ հարուցելու միջոցով հասնել ֆիլմի հետագա ցուցադրումներն արգելելու վճռին: Թերթը նաեւ կոչ է անում համաշխարհային ճանաչման արժանացած թուրքական կազմակերպություններինՙ ակտիվորեն պայքարել ֆիլմի ցուցադրումն արգելելու համար:
Ավելինՙ «Թըրքիշ սթարը» հորդորում է կառավարությանն իր հերթին ֆիլմ նկարահանել Վանում եւ Կարսում հայերի ու ռուս բանակայինների գործած «վայրագությունների» մասին:
Հ. Ծ.