Պուտին - Քոչարյան հանդիպում Կրեմլում
ՄՈՍԿՎԱ, 18 ԴԵԿՏԵՄԲԵՐ, ԱՐՄԵՆՊՐԵՍ: Ռուսաստանի նախագահ Վլադիմիր Պուտինը եւ Հայաստանի նախագահ Ռոբերտ Քոչարյանը այսօր Կրեմլում կայացած բանակցությունների ընթացքում հիմնականում քննարկել են երկկողմ տնտեսական համագործակցությանն առնչվող հարցեր: Այդ մասին երկու ժամ տեւած բանակցությունների ավարտից հետո լրագրողներին հայտնեց ՌԴ կառավարության փոխնախագահ Իլյա Կլեբանովը: Նրա խոսքերով, «նախագահները տնտեսական թեմային հատկացրել են բանակցությունների ժամանակի առյուծի բաժինը»:
Ըստ Կլեբանովի, արծարծվել է երկու պետությունների ղեկավարների միջեւ ձեռք բերված պայմանավորվածությունների իրականացման հարցը, որոնք հանգում են «պարտքերի դիմաց ներդրումներ» ձեւակերպմանը: «Այսօր այդ պայմանավորվածությունների իրականացումը շատ առաջ է գնացել»,-ասաց փոխվարչապետը: Կլեբանովն ընդգծեց, որ կողմերը «բավարարված են կատարված աշխատանքից, բայց կա նաեւ այն բանի ըմբռնումը, որ հարկավոր է ավելի արագ առաջ շարժվել»:
Փոխվարչապետը նշեց, թե նախապատրաստված է միջկառավարական համաձայնագիր, որը կարգավորում է «պարտքերի դիմաց ներդրումներ» բանաձեւը: «Երկու երկրների նախագահները հանդես են գալիս այն բանի օգտին, որ ըստ կարելվույն արագ այդ համաձայնագիրը ներկայացվի ստորագրման», - հայտնեց Կլեբանովը:
Վլադիմիր Պուտինը եւ Ռոբերտ Քոչարյանը քննարկել են նաեւ երկու երկրների փոխհարաբերությունները գազի եւ էներգետիկայի բնագավառներում, ինչպես նաեւ Հայկական ատոմակայանի զարգացմանը նպատակամղված համատեղ աշխատանքը:
Մինչ ՌԴ նախագահի հետ հանդիպումը, ՀՀ նախագահը նշել է, որ Հայաստանին մտահոգում են երկու երկրների տնտեսական հարաբերություններում առկա խոչընդոտները, որոնց զարգացման համար անհրաժեշտ են նոր խթաններ: ՌԴ նախագահ Վ. Պուտինը գոհունակություն է հայտնել երկու նախագահների շարունակական շփումների առումով, եւ համոզմունք հայտնել, որ բանակցությունները հաջողություն կունենան:
Երեկ երեկոյան ՀՀ նախագահ Ռ. Քոչարյանը հանդիպում է ունեցել «Գազպրոմ» եւ «Իտեռա» ընկերությունների նախագահների հետ, որի ընթացքում քննարկվել են էներգետիկ ոլորտում համագործակցությանն առնչվող հարցեր: