ՄՈՍԿՎԱ, 18 ԴԵԿՏԵՄԲԵՐ, ԱՐՄԵՆՊՐԵՍ: Հայաստանի նախագահ Ռոբերտ Քոչարյանը եւ Ռուսաստանի կառավարության նախագահ Միխայիլ Կասյանովը արտահայտվել են երկու երկրների փոխգործակցության խորացման նպատակով ավելի վաղ ձեռք բերված համաձայնությունների շուտափույթ իրականացման օգտին:
Այսօր, բացելով բանակցությունները Հայաստանի նախագահի հետ, Կասյանովը նշել է, որ, թեեւ երկու երկրների նախարարություններն ակտիվորեն են աշխատում, այդուամենայնիվ ձեռք բերված պայմանավորվածությունների իրականացումը փոքր-ինչ ձգձգվում է: Վարչապետի ասելով, Ռուսաստանը եւ Հայաստանը պետք է այդ ոլորտում աշխատանքն ավարտեն «ամենակարճ ժամանակում»:
ՀՀ նախագահ Ռոբերտ Քոչարյանն իր կողմից նշել է, որ Ռուսաստանի մայրաքաղաք կատարած իր այցը «կապված է այն անհանգստության հետ, որ մենք կարող ենք չտեղավորվել սահմանված ժամկետներում»: Նա նշել է, որ «նախագահների համար դյուրին է պայմանավորվել, իսկ դրան հետեւում է նախարարությունների ծանր աշխատանքը, որը պետք է հասցնել տրամաբանական ավարտի»:
Միխայիլ Կասյանովը փոխվարչապետ, գիտության, արդյունաբերության եւ տեխնոլոգիաների նախարար Իլյա Կլեբանովին հանձնարարել է արագացնել Հայաստանի այն ձեռնարկությունների ցանկի նախապատրաստումը, որոնց բաժնետոմսեր ստանալու հարցում Ռուսաստանը կարող է շահագրգռված լինել: Այդ մասին այսօր լրագրողներին հայտնել է ՌԴ վարչապետի մամուլի քարտուղար Տատյանա Ռաշբաշըՙ Հայաստանի նախագահ Ռոբերտ Քոչարյանի եւ Միխայիլ Կասյանովի միջեւ կայացած բանակցություններից հետո:
Հանդիպման ընթացքում Միխայիլ Կասյանովը եւ Ռոբերտ Քոչարյանը քննարկել են նաեւ Հայաստան ռուսաստանյան ալմաստի հումքի մատակարարումների մասին համաձայնագրի նախագծի նախապատրաստման ընթացքը: