Ինչպես հայտնի է, «Արարատցեմենտ» ՊՓԲԸ դեռեւս անցած տարի, ՀՀ կառավարության որոշմամբ, ներկայացվել էր սեփականաշնորհման: Գործարանի նկատմամբ հետաքրքրություն ցուցաբերողների գերակշռող մասն արտասահմանյան ընկերություններ էինՙ Լիբանանից, Շվեյցարիայից եւ այլն: Ի դեպ, ՀՀ կառավարության առաջադրած պայմանները բավարարում էր ընդամենը մեկ կազմակերպություն Շվեյցարիայից, որն էլ, սակայն, գործընթացի վերջին փուլում հրաժարվեց (իրական պատճառներն այդպես էլ մնացին նեղ շրջանակներում):
Ըստ Արարատի մարզպետարանի առեւտրի եւ արդյունաբերության բաժնի վարիչ Հրայր Հակոբյանի, կառավարությունն այս տարի հանդես կգա սեփականաշնորհման վերաբերյալ նոր հայտարարությամբ: Նա նշեց, որ գործարանն առայժմ պետական է եւ պատկանում է ՀՀ առեւտրի եւ արդյունաբերության նախարարությանը: Արամ Սարգսյանի աշխատանքից ազատվելուց հետո տնօրեն է նշանակվել Արարատի նախկին քաղաքապետ Գագիկ Գասպարյանը: Իսկ թե ե՞րբ կլինի սեփականաշնորհման հայտարարությունը, առայժմ դժվար է կանխատեսել: Գործարանը ներկայումս աշխատում է փոքր հզորությամբ, թերեւս, նախկինում նույնպես ամբողջ հզորությամբ չի աշխատել (15-20 տոկոս): Աշխատանքային հզորությունը տարեցտարի փոքրացավ, քանի որ գործարանն իր արտադրանքով ապահովում էր միայն ներքին պահանջարկը: Պրն Հակոբյանի կարծիքով, գործարանը մեծ հզորությամբ չկարողացավ աշխատել հիմնականում շուկայի բացակայության պատճառով:
ՆԵԼԼԻ ՍԱՀԱԿՅԱՆ