Նպատակ ունենալով տպավորել նախագահ Բուշին, Թուրքիայի վարչապետ Էջեւիթն իր ԱՄՆ կատարած այցելության նախօրյակին հայտարարեց, որ այսուհետ վերացվում է Հայաստանի քաղաքացիների նկատմամբ կիրառվող այցագրային ռեժիմը: Բայց հենց այցելությունն ավարտվեց եւ տուն վերադարձավ, նա ազատ զգաց իրեն փոխելու խոսելու տոնը եւ որոշ կոշտ արտահայտություններ անելու Հայաստանի հասցեին:
Անկարայում թուրքական մամուլին նա տեղեկացրել է, որ նախագահ Բուշը շնորհակալություն է հայտնել իրեն հայ զբոսաշրջիկներին ընձեռվածՙ հեշտությամբ վիզա ստանալու հնարավորության համար: Բայց Բուշի այն հարցին, թե արդյոք նա մտադի՞ր է այլ միջոցներ էլ գործի դնելՙ բարելավելու թուրք-հայկական հարաբերությունները, Էջեւիթը պատասխանել է, որ ոչ մի նոր քայլի չի դիմի մինչեւ Հայաստանը չկատարի հետեւյալ չորս պարտավորությունները.
ա) Հայաստանը պետք է դադարեցնի Թուրքիային անհարմար դրության մեջ դնելըՙ անընդհատ վանկարկելով «ենթադրյալ» ցեղասպանության մասին:
բ) Ղարաբաղը պետք է վերադարձվի Ադրբեջանին:
գ) Ադրբեջանցի փախստականներին պետք է թույլատրվի վերադառնալ իրենց տներըՙ Ղարաբաղում:
դ) Հայաստանը պետք է միջանցք բաց անի Նախիջեւանի եւ Ադրբեջանի միջեւ:
Թուրքական կառավարությունը տարիներ շարունակ մերժել է առանց նախապայմանների դիվանագիտական հարաբերություններ հաստատելու Հայաստանի առաջարկը: Այժմ ուղղակի ծիծաղելի է, որ Թուրքիան ինքն է նախապայմաններ դնում: Հետաքրքիր է, թե ինչպես կվերաբերվեր աշխարհը, եթե գերմանական կառավարությունը հայտարարեր, որ Իսրայելի հետ հաշվի չի նստելու, մինչեւ վերջինս չդադարեցնի «ենթադրյալ» Հոլոքոսթի մասին վանկարկել:
ՀԱՐՈՒԹ ՍԱՍՈՒՆՅԱՆ, «Կալիֆոռնիա կուրիեր»