Ֆուտբոլի ՀՀ ազգային հավաքականի կիսապաշտպան Ալբերտ Սարգսյանը, որին Մոսկվայի «Լոկոմոտիվը» տրանսֆերի էր հանել, վերջապես ընդգրկվեց նոր թիմում։ Նա 2 տարով պայմանագիր է կնքել Մոսկվայի «Տորպեդոյի» հետ։ Նշենք, որ մոսկովյան այս ակումբում հայտավորված են հայազգի երիտասարդ 2 ֆուտբոլիստներՙ Կարեն Օհանյանն ու Կիրիլ Գրիգորյանը։ Օհանյանը դեռեւս անցյալ մրցաշրջանում «Տորպեդոյի» փոխարինողների կազմում աչքի էր ընկնում իր արդյունավետ խաղով եւ գլխավոր մարզիչ Վիտալի Շեւչենկոյի հավաստմամբՙ այս տարի տեղ կզբաղեցնի թիմի հիմնական կազմում։ Օհանյանն իրեն լավագույն կողմերով է դրսեւորել նաեւ նոր մրցաշրջանի նախապատրաստական փուլում թիմի անցկացրած ստուգողական հանդիպումներում։