եՐԵՎԱՆ, 25 ՄԱՐՏ, ԱՐՄԵՆՊՐԵՍ Հայաստանում ապրող քրդերը նշեցին մուսուլմանական աշխարհի Նոր տարինՙ Նովրուզը։ Ավանդաբար այս տոնը նրանց համար եղել է պայքարի տոնՙ հանուն իրենց ժողովրդի ազատության եւ անկախության եւ կոչվել է «նովրուզյան կռիվներ»։ Այս մասին ասաց ՔԴԿ Կովկասյան տարածաշրջանի ղեկավար Սադունը, հանդես գալով Նովրուզի առթիվ Երեւանի մարզահամերգային համալիրում երեկ կազմակերպված ցերեկույթում, որը նվիրված էր հայ-քրդական բարեկամությանը։ Այստեղ էին հավաքվել Հայաստանի տարբեր մարզերի քուրդ բնակչության բազմաթիվ ներկայացուցիչներ։
Ցերեկույթը եզրափակվեց համերգով. ելույթ ունեցան երգիչ- երգչուհիներ,գեղարվեստական խմբերՙ ներկայացնելով հայ եւ քուրդ ժողովրդական երգեր ու պարեր։
Այսպիսի տոնախմբությունները, Արմենպրեսի թղթակցին ասաց քուրդ գրող, իրավապաշտպան Ալիխանե Մամեն, բարձրացնում են ժողովրդի մարտական ոգին, նրան կապում իր մայր արմատներին։ Ահա թե ինչու տարիներ շարունակ Թուրքիայում արգելվում էր այս տոնը, թեպետ քրդերը չէին ընկրկում եւ այդ տոնը նշում էին որպես իրեն ազատության ու պայքարի խորհրդանիշ։ Տեսնելով, որ արգելքն անզոր է, Թուրքական իշխանություններն ի վերջո պաշտոնապես ընդունեցին այդ տոնը, եւ հիմա քրդերն այն նշում են աշխարհի բոլոր ծայրերում։