ՎԱՇԻՆԳՏՈՆ, 16 ԱՊՐԻԼ, ՆՈՅՅԱՆ ՏԱՊԱՆ։ Ջորջ Բուշի վարչակազմը ստացել է ԱՄՆ Կոնգրեսի հավանությունը եւ ավելացնում է աջակցությունն Ադրբեջանին «անվտանգության բնագավառում»։ Այդ մասին «Նովոստի» գործակալությանը հայտարարել է ԱՄՆ պետդեպարտամենտի նախկին ԽՍՀՄ երկրներին աջակցության հարցերի կոորդինատոր Ուիլյամ Թեյլորը։ Երկուշաբթի Վաշինգտոնում լրագրողներին Թեյլորը հայտնել է, որ ԱՄՆ-ը ծրագրում է նաեւ ընդլայնել աջակցությունը Ադրբեջանին այնպիսի բնագավառներում, ինչպիսին են «ահաբեկչական խմբերին ուղղված ֆինանսական հոսքերին հետեւելը», պայքարը փողերի լվացման, կոռուպցիայի դեմ, ինչպես նաեւ սահմանների պահպանության ուժեղացումը։ «Մեր զինվորականները այժմ կրկին կարող են աշխատել Ադրբեջանի զինվորականների հետ հակաահաբեկչական պատերազմի շրջանակներում եւ կարող են ապահովել ամերիկյան զինված ուժերի տեղափոխումը եւ ամերիկյան թիկունքային ապահովումը Կենտրոնական Ասիա տանող միջանցքներով», ընդգծել է պետդեպարտամենտի կոորդինատորը։