Դուբայում անցկացվող շախմատի միջազգային մրցաշարում անցկացված 7 տուրից հետո մրցաշարային աղյուսակը 6 միավորով գլխավորում է ուկրաինացի Գոլոշչապովը, որը ոչ-ոքի խաղաց ռուսաստանցի Վոլկովի հետ։ Վերջինս Էլվեստի հետ վաստակել է 5,5 միավոր։ Առաջատարներին 5-ական միավորով հետապնդում են 9 շախմատիստներ։ Արտաշես Մինասյանի օգտին գրանցված է 4,5 միավոր։ Արտաշեսը 5-րդ տուրում պարտվեց Պետեր Աքսին, հաջորդ մրցախաղը շահեց Սարջանից, իսկ 7-րդ տուրում ոչ-ոքի խաղաց Մաքսիմ Տուրովի հետ։ Իր մրցաշարային վիճակը փոքր-ինչ բարելավեց Աշոտ Անաստասյանը։ 5-րդ տուրում Աբդուլ էլ Արոուսիից պարտվելուց հետո նա հաղթեց Գեորգի Լիին եւ Ալգուդաիմիին։ 7 հնարավորից Անաստասյանը վաստակել է 3,5 միավոր։ Մրցաշարի ավարտին մնացել է 2 տուր։