Մեծի տանն Կիլիկիո կաթողիկոսության դիվանն առանձին հաղորդագրությամբ տեղեկացնում է, որ մայիսի 10-ին Անթիլիաս է ժամանել Թուրքիո հայոց պատրիարք Մեսրոպ արք. Մութաֆյանը։ Անթիլիասի տաճարում կարճ աղոթասացությունից հետո Մեսրոպ պատրիարքը հանդիպում է ունեցել Արամ Ա կաթողիկոսի հետ, որի հյուրն է եղել Լիբանանում իր կեցության ընթացքում։ Նույն օրը պատրիարքը մասնակցել է Հռոմի կաթոլիկ եկեղեցու «Քրիստոնեական միություն» խորհրդի քարտուղար Մարկ Ուելեթ եպիսկոպոսի եւ այլ եկեղեցականների հետ Արամ կաթողիկոսի հրավիրած ճաշկերույթին։ Մինչ այդ Վատիկանի ներկայացուցիչն Արամ կաթողիկոսի հետ քննարկել էր երկու աթոռների, ինչպես նաեւ կաթոլիկ եւ արեւելյան ուղղափառ եկեղեցիների հարաբերությունների վիճակը։
Մայիսի 12-ին Թուրքիո հայոց պատրիարքը Անթիլիասի տաճարում ներկա է գտնվել եպիսկոպոսական ձեռնադրության։
Հիշեցնենք, որ Մեսրոպ պատրիարքը չէր մասնակցում Մայր աթոռ Սբ. Էջմիածնի Հոգեւոր գերագույն խորհրդի վերջին նիստին, որին ի պաշտոնե համաատենապետում է։