«Ազգը» տեղեկացրել էր, որ Ինտերտոտոյի գավաթի մրցաշարում «Շիրակը» մրցելու է պորտուգալական թիմի հետ։ Պորտուգալիայի առաջնությունն արդեն ավարտվել է, եւ հայտնի են դարձել եվրագավաթների մասնակիցները։ Ինչպես տեղեկացրեց ֆուտբոլի հանրապետական ֆեդերացիայի գործադիր տնօրենի տեղակալ Էմին Բաղյանը, «Շիրակի» մրցակիցը Պոնտո Դելգադա քաղաքի «Դեպորտիվո Սանտա Կլարա» թիմն է։ Առաջին խաղը կայանալու է մրցակցի դաշտում հունիսի 22-ին կամ 23-ին, պատասխան հանդիպումը տեղի կունենա մեկ շաբաթ անց։ Հանդիպումների կոնկրետ օրերը կորոշվեն երկու ակումբների ներկայացուցիչների բանակցությունների միջոցով։
Ընթերցողներին տեղեկացնենք, որ «Շիրակի» մրցակիցը Պորտուգալիայի վերջերս ավարտված առաջնությունում 18 թիմերի մրցավեճում գրավել է 14-րդ տեղը (+9=10-15, 32-46)։ Եվրոպական չափանիշներով «Դեպորտիվո Սանտա Կլարան» միջակ թիմ է, սակայն պորտուգալական ֆուտբոլի ներուժը մեծ է։ «Շիրակը» 2-րդ անգամ է մասնակցելու Ինտերտոտոյի գավաթի մրցաշարին։ Անցյալ տարի թիմը հիանալի հնարավորություն ուներ մտնելու հաջորդ փուլ։ Առաջին խաղում հյուրընկալվելիս հաղթելով Հունգարիայի «Լոմբարդին» (3։2), շիրակցիները Գյումրիում ձեռքից բաց թողեցին պայքարը շարունակելու հնարավորությունըՙ մրցակցին զիջելով 1։3 հաշվով։ Հայաստանի թիմերը Ինտերտոտոյի մրցաշարում հանդես են գալիս 1998 թ.-ից։ Նորամուտն անհաջող էր. «Էրեբունի-ՀՄՄ¬ն» 2 խաղերի ընդհանուր արդյունքով (0։6, 1։1) զիջեց Քութաիսի «Տորպեդոյին»։ Հաջորդ տարի «Արարատին» հաջողվեց հաղթահարել առաջին փուլի արգելքըՙ երկու խաղերում էլ միեւնույն 1։0 հաշվով պարտության մատնելով ռումինական «Բաքեու» թիմին։ Հաջորդ փուլում «Արարատը» զիջեց բելգիական «Սենտ Տրյուդենին» (0։2, 1։3)։ Անհաջող էր նաեւ «Արաքսի» ելույթը, որն առաջին փուլում պարտվեց չեխական «Սիգմային» (1։2, 0։1)։ Հուսանք, որ «Շիրակի» 2-րդ փորձը գոնե հաջող կլինի։