ԵՐԵՎԱՆ, 21 ՄԱՅԻՍ, ԱՐՄԵՆՊՐԵՍ։ Մայիսի 22-ին երկօրյա պաշտոնական այցով Երեւան կժամանի ՌԴ Դաշնային ժողովի Դաշնության խորհրդի նախագահ Սերգեյ Միրոնովի գլխավորած պատվիրակությունը։
Ըստ ՀՀ ԱԺ հասարակայնության հետ կապերի վարչության, մայիսի 22-ին Ս. Միրոնովը ծաղկեպսակ կդնի 1915 թ. Հայոց ցեղասպանության զոհերի հիշատակի հուշահամալիրում, կայցելի թանգարան, ապա կլինի հայ-ռուսական սլավոնական համալսարանում։
Խորհրդարանում Ս. Միրոնովն առանձնազրույց կունենա ՀՀ ԱԺ նախագահ Արմեն Խաչատրյանի հետ, կհանդիպի Աժ մշտական հանձնաժողովների նախագահների, խմբեր-խմբակցությունների ղեկավարների հետ։ Նույն օրը նախատեսված է հանդիպում ՀՀ նախագահ Ռոբերտ Քոչարյանի հետ։ Օրվա հանդիպումները կամփոփվեն մամլո ասուլիսով։
Մայիսի 23-ին պատվիրակությանը կընդունի Ն.Ս.Օ.Տ.Տ. Ամենայն հայոց Գարեգին Բ կաթողիկոսը։
Նույն օրը ՌԴ Դաշնային ժողովի Դաշնության խորհրդի նախագահ Սերգեյ Միրոնովի գլխավորած պատվիրակությունը կմեկնի Թբիլիսի։