Բազմավաստակ Անդրանիկ Փոլատյանին
Այս տարի լրանում է ծանոթ խմբագիր, գրականագետ, հասարակական գործիչ եւ Թեքեյան մշակութային միության Ամերիկայի շրջանակի հիմնադիրներից Անդրանիկ Փոլատյանի ազգային ծառայությունների հիսնամյակը։
Ամբողջ կես դար շարունակ նա անշահախնդրորեն նվիրվել է Ռամկավար Ազատական կուսակցությանը, ՀԲԸՄիությանը, ԹՄՄ-ին եւ «Մարաշի» հայրենակցական միությանըՙ սատարելով եւ ամրապնդելով մի կողմից ամերիկահայության ազգապահպանման խնդիրներին, մյուս կողմիցՙ նրանց հոգեւոր կապը մայր հայրենիքի եւ Սբ. Էջմիածնի հետ։
Լինելով Կիպրոսի ՀԲԸՄիության Մելգոնյան կրթական հաստատության (1950 թ.-ին) եւ Բեյրութի ամերիկյան համալսարանի (1954 թ.-ին) շրջանավարտ, Փոլատյանը նախ Բոստոն է մեկնում եւ ապա Ֆրեզնոՙ ստանձնելու համապատասխանաբար «Պայքար» օրաթերթի եւ «Նոր օր» եռօրյայի խմբագրի պաշտոնները։
Այնուհետեւ միանում է ՀԲԸՄ-ին եւ մինչեւ կենսաթոշակի անցնելըՙ 1993 թ., համառ ու հետեւողական աշխատանքով նվիրվում նրա մշակած թե՛ կրթական, թե՛ մարդասիրական ծրագրերի իրականացմանը։ Մոտ քառասուն տարի խմբագրում է այս հաստատության «Յուշարար-միութիւն» պաշտոնաթերթը։ Փոլատյանն է, որ Թեքեյանի անունը սիրելի է դարձնում Միացյալ Նահանգներում, հիմնում ինչպես Թեքեյան վարժարանի օժանդակ մարմինները, այնպես էլՙ գաղափարակիցների համագործակցությամբ Հյուսիսային Ամերիկայի Թեքեյան մշակութային միությունը, որը կարճ ժամանակում իր մասնաճյուղերն է բացում եւ գործունեություն ծավալում հայաշատ կարեւոր ոստաններում։
Վաստակաշատ մշակիՙ Անդրանիկ Փոլատյանի ոսկյա հոբելյանն, ըստ ստացված տեղեկատվության, նշվելու է սեպտեմբերի վերջերինՙ Նյու Ջերսիում։ Այդ առթիվ լույս է ընծայվելու ծաղկաքաղ մի հատոր, որը պարփակելու է հոբելյարի կեսդարյա հրապարակագրական հոդվածների մի մասը։
Կազմված է հոբելյանական հանձնաժողովՙ պատվո նախագահությամբ Երուսաղեմի Հայոց պատրիարք Թորգոմ արք. Մանուկյանի, Ամերիկայի Հայոց առաջնորդ Խաժակ արք. Պարսամյանի, ՀԲԸՄ-ի փոխնախագահ Նազար Նազարյանի եւ ՌԱԿ Կենտրոնական վարչության ատենապետ Հակոբ Գասարճյանի։ Հանձնախմբի մաս կազմող մյուս անդամներն են ծանոթ մտավորականներ եւ հասարակական գործիչներ են։ Գործադիր հանձնախումբը գլխավորելու է Հակոբ Վարդիվառյանը։
Հ. Ծ.