Այսօր, հունիսի 4-ին, Ռուսաստանի Դաշնության Անվտանգության խորհրդի քարտուղար Վլադիմիր Ռուշայլոյի հրավերով Հայաստանի Հանրապետության նախագահին առընթեր Ազգային անվտանգության խորհրդի քարտուղար, պաշտպանության նախարար Սերժ Սարգսյանը կմեկնի Մոսկվաՙ մասնակցելու ՌԴ Անվտանգության խորհրդի 10-ամյակին նվիրված տոնակատարություններին, ինչպես նաեւ արդի փուլում անվտանգության հիմնախնդիրներին նվիրված գիտաժողովի աշխատանքներին, որոնց ընթացքում նախատեսվում է Սերժ Սարգսյանի ելույթը։
Այս մասին պաշտպանության նախարարությունից մեր ստացած հաղորդագրությունը տեղեկացնում է նաեւ, որ հունիսի 7-ին ՀՀ պաշտպանության նախարարը Բրյուսելում կմասնակցի Եվրատլանտյան գործընկերության խորհրդի պաշտպանության նախարարների հերթական նիստին։ Օրակարգում են ահաբեկչության դեմ միջազգային պայքարի, Եվրատլանտյան գործընկերության հետագա զարգացման, ինչպես նաեւ Բալկաններում ստեղծված իրավիճակին առնչվող հարցեր։
Մինչ այդ, հունիսի 3-ին պաշտպանության նախարար Սերժ Սարգսյանն ընդունեց Հայաստանում Չինաստանի դեսպան պրն Ցզո Սյուելյանին, որին ուղեկցում էր Չինաստանի դեսպանատան ռազմական կցորդ, գնդապետ Յույ Սյաույույը։
Հանդիպման ընթացքում քննարկվեցին հայ-չինական հարաբերությունների ներկա մակարդակն ու զարգացման հեռանկարները, տարածաշրջանային անվտանգության խնդիրներ, ինչպես նաեւ երկկողմ համագործակցության հնարավոր ուղիները։
ՀՀ պաշտպանության նախարարը հաջողություն մաղթեց նորանշանակ դեսպանին եւ հույս հայտնեց, որ Հայաստանում նրա առաքելության ընթացքում հայ-չինական հարաբերությունները վերընթաց զարգացում կապրեն։