ՍՏԵՓԱՆԱԿԵՐՏ, 3 ՀՈՒՆԻՍ, ՆՈՅՅԱՆ ՏԱՊԱՆ։ ԼՂՀ նախագահի թեկնածուների առաջադրումը կընթանա հունիսի 27-ից մինչեւ հուլիսի 12-ը, իսկ նախընտրական քարոզարշավը կտեւի հուլիսի 23-ից մինչեւ օգոստոսի 10-ը։ Ինչպես հայտնեց ԼՂՀ Կենտրոնական ընտրական հանձնաժողովի նախագահ Սերգեյ Դավթյանը, օգոստոսի 11-ին անցկացվելիք քվեարկությունից 28 ժամ հետո կհրապարակվեն ընտրությունների նախնական արդյունքները, իսկ 72 ժամ հետոՙ վերջնական։ Քվեաթերթիկներում միաձեւ նշում կատարելուՙ ԼՂՀ ԱԺ «ՀՅԴ» խմբակցության առաջարկության կապակցությամբ ԿԸՀ նախագահը կարծիք հայտնեց, որ ընտրողներն առայժմ պատրաստ չեն դրան։ Նրա խոսքերով, ժողովուրդը սովորել է բազմաձեւ նշումներին, եւ այդ կարգի կտրուկ փոփոխությունը կարող է բերել նրան, որ անվավեր ճանաչված քվեաթերթիկների թիվը կգերազանցի վավեր քվեաթերթիկների թիվը։