«ԱԶԳ» ՕՐԱԹԵՐԹ

ՄԿՐՏՉՅԱՆՆ ԱՌԱՋԱՏԱՐՆԵՐԻ ՇԱՐՔՈՒՄ Է

Բուլղարիայի Վառնա քաղաքում ավարտին է մոտենում կանանց շախմատի Եվրոպայի 3-րդ առաջնությունը։ Վերջնագծից 2 տուր առաջ միանձնյա առաջատարը բուլղարուհի Ստեֆանովան է, որը 9 հնարավորից վաստակել է 8 միավոր։ 2-րդ հորիզոնականը զբաղեցնում է ռուսաստանցի միջազգային գրոսմայստեր Եկատերինա Կովալեւսկայան (7 միավոր)։ Երեւանցի միջազգային գրոսմայստեր Լիլիթ Մկրտչյանը 6,5 միավորով Ալիսա Գալյամովայի, Նադեժդա Կոսինցեւայի, Սվետլանա Պրուդնիկովայի եւ Նինո Խուրցիձեի հետ բաժանում է 3-7-րդ տեղերը։ Մկրտչյանից բացի, առաջնության 114 մասնակիցների թվում են եւս 5 հայ շախմատիստուհիներՙ Էլինա Դանիելյանը (5,5 միավոր), Լիլիթ Գալոյանը (5), Գոհար Հլղաթյանը (4,5), Նարինե Գասպարյանը (4,5) եւ Նաիրա Մովսիսյանը (4)։