ԹԲԻԼԻՍԻ, 13 ՀՈՒՆԻՍ, ԱՐՄԵՆՊՐԵՍ։ Վրաստանի ազգային անվտանգության խորհրդի եւ մի շարք նախարարությունների փորձագետների խումբն այսօր ուղեւորվել է Մոսկվա։ Ինչպես «Փրայմ նյուսին» հայտնել է Ազգային անվտանգության խորհրդի փոխքարտուղար Ջեմալ Գախոկիձեն, սկսվել է Հայաստանի, Ռուսաստանի, Ադրբեջանի եւ Վրաստանի անվտանգության խորհուրդների քարտուղարներիՙ հոկտեմբերին նշանակված հանդիպման նախապատրաստումը։ Ըստ Գախոկիձեի, այդ համաժողովի ընթացքում, որն անցկացվելու է Վրաստանում, կքննարկվեն տարածաշրջանի համար հրատապ բազմաթիվ խնդիրներ, ընդսմին շեշտը կդրվի չորս պետությունների տնտեսական անվտանգության հարցերի վրա։