«ԱԶԳ» ՕՐԱԹԵՐԹ

ԳԱԲՐԻԵԼ ՍԱՐԳՍՅԱՆՆ ԱՌԱՋԱՏԱՐՆԵՐԻ ԹՎՈՒՄ

Բաթումում ընթացող շախմատի Եվրոպայի տղամարդկանց առաջնության 8-րդ տուրի հանդիպումներն էական փոփոխություն չմտցրին առաջատարների ցուցանիշներում։ Առաջատար քառյակը պարտիաներն ավարտեց ոչ-ոքի։ Այժմ Մաչեայի, Գալկինի, Սոչկոյի եւ Յակովենկոյի հաշվին գրանցված է 6-ական միավոր։ Առաջատարներին ընդամենը կես միավորով են զիջում ինը շախմատիստներ, որոնց թվում է նաեւ Գաբրիել Սարգսյանը։ Նա 8-րդ տուրում սպիտակներով հաղթեց Աշոտ Անաստասյանին, որի հաշվին գրանցված է 4,5 միավոր։ Հայ շախմատիստների մեջ 2-րդ արդյունքը (5 միավոր) պատկանում է գրոսմայստեր Արտաշես Մինասյանին, որը ոչ-ոքի խաղաց Վալերի Գափրինդաշվիլու հետ։ Կարեն Ասրյանը, Լեւոն Արոնյանը եւ Արա Մինասյանը 4,5-ական միավորով Անաստասյանի հետ գտնվում են աղյուսակի չորրորդ տասնյակում։ 4 միավոր է վաստակել Արթուր Չիբուխչյանը։ Դավիթ Հարությունյանն ունի 3,5, Արսեն Եղիազարյանըՙ 2,5 միավոր։