ՍՈՖԻԱ, 27 ՀՈՒՆԻՍ, ԱՐՄԵՆՊՐԵՍ։ Հայաստանի եւ Բուլղարիայի ու նրանց ժողովուրդների փոխհարաբերությունները խոր արմատներ ունեն եւ աչքի են ընկնում «եղբայրությամբ եւ սիրով»։ Չորեքշաբթի օրը այսպիսի հայտարարություն է արել պաշտոնական այցով այստեղ գտնվող Հայ առաքելական եկեղեցու առաջնորդ Գարեգին Երկրորդ կաթողիկոսը։
Նրան ընդունել են Բուլղարիայի նախագահ Գեորգի Պիրվանովը եւ խորհրդարանի նախագահ Օգնյան Գեջիկովը։ Հայոց հոգեւոր առաջնորդը գոհունակություն է հայտնել այն հեռանկարի առթիվ, որ բացվում է Սոֆիայի եւ Երեւանի փոխհարաբերություններում։ Պատրիարք Մաքսիմի հրավերով Բուլղարիա ձեռնարկած իր այցը նա գնահատել է որպես Հայ առաքելական եւ Բուլղարական ուղղափառ եկեղեցիների «էկումենիկ հարաբերությունների ապացույց»։
Իր հերթին նախագահ Պիրվանովն ընդգծել է, որ վերջին ժամանակներս Բուլղարական ուղղափառ եկեղեցին ուժեղացնում է իր հեղինակությունն ու ազդեցությունըՙ արդյունավետ հարաբերություններ հաստատելու այլ դավանանքների ներկայացուցիչների հետ։ Ըստ նրա, դրա օրինակներից մեկն է Հռոմի պապիՙ մայիսի վերջերին Բուլղարիա կատարած այցը։