Տեղի է ունեցել Հայաստանի Ռամկավար Ազատական կուսակցության Հանրապետական վարչության հերթական նիստը։ Ժողովը լսել է ՀՌԱԿ Հանրապետական վարչության փոխատենապետ Հարություն Առաքելյանի զեկուցումը «Կուսակցության վարչության արտագնա նիստերի մասին»։ Որոշում է ընդունվել հուլիսի 5-ին Գյումրիում հրավիրել ՀՌԱԿ վարչության նիստՙ կուսակցության Շիրակի շրջանային վարչության մասնակցությամբ։ Նիստի ընթացքում քննարկվելու է կուսակցության կառույցների ստեղծման եւ աշխատանքի ընթացքն այդ տարածաշրջանում։ Հաջորդ շաբաթ արտագնա նիստ է հրավիրելու ՀՌԱԿ Լոռու շրջանային վարչության անդամների մասնակցությամբ։
ՀՌԱԿ Հանրապետական վարչությունն անդրադարձել է Ազգային ժողովի նախատեսած փոփոխությանը, որը վերաբերում է մեծամասնական եւ համամասնական սկզբունքով ընտրվածների թվաքանակին։ Հաստատելով կուսակցության դիրքորոշումը, ըստ որի Ազգային ժողովը պարտավոր է հարգել իր իսկ ընդունած որոշումները, ՀՌԱԿ Հանրապետական վարչությունն անընդունելի գտավ, որ այլ կազմակերպությունների ղեկավարներ կուսակցության այդ դիրքորոշման մասին հայտարարություններ կատարեն։ Որոշում է ընդունվել խնդրո հարցի կապակցությամբ հանդես գալ առանձին հայտարարությամբ։
Վարչությունը քննարկել է Հայաստանի ներքին եւ արտաքին քաղաքականությանը վերաբերող մի շարք այլ հարցեր։