ՄՈՍԿՎԱ, 15 ՀՈՒԼԻՍ, ԱՐՄԵՆՊՐԵՍ։ Մոսկվայի մարզի Կրասնոարմեյսկ քաղաքում անվտանգության լրացուցիչ միջոցներ են ձեռնարկված։ Ինչպես ԻՏԱՌ-ՏԱՍՍ-ին հաղորդել է ներքգործքաղբաժնի հերթապահը, անկարգությունների համար ձերբակալվածների պաշտպանության հերթական հանրահավաքներ անցկացնելու մասին տեղեկատվություն չկա։ Բայց չնայած դրան, Կրասնոարմեյսկում տակավին անվտանգության լրացուցիչ միջոցներ են ձեռնարկվում։ Փողոցները պարեկում են միլիցիայի ուժեղացված կարգախմբերը, քաղաքում հերթապահում են նաեւ հատուկ նշանակության ստորաբաժանումները։
Կրասնոարմեյսկ եւ մերձմոսկովյան մի շարք այլ քաղաքներ են ուղարկվել հատուկ խմբերՙ հետաքննելու ազգամիջյան միջադեպերը։ Մոսկվայի մարզի նահանգապետ Բորիս Գրոմովը նշել է, որ «իրեն շատ է անհանգստացնում կենցաղային ազգայնականության բռնկումը տարածաշրջանում, որտեղ միշտ էլ ապրել են այլ ազգությունների ներկայացուցիչներ, այդ թվում եւ ԱՊՀ-ի երկրներից սերողներ»։