Հուլիսի 29-ին ՀՀ տրանսպորտի եւ կապի նախարար Անդրանիկ Մանուկյանի մոտ կայացած ընդլայնված խորհրդակցությունում, որին մասնակցել են նախարարության համակարգի ընկերությունների տնօրենները, քննարկվել են 2002 թվականի առաջին կիսամյակում ընկերությունների ֆինանսատնտեսական գործունեության արդյունքները, տեղեկացնում է ՀՀ տրանսպորտի եւ կապի նախարարության լրատվական ծառայությունը։
Նախորդ տարվա նույն ժամանակաշրջանի համեմատությամբ համակարգի ընկերությունների ընդհանուր եկամուտն աճել է 19,9 տոկոսով, իսկ հաշվեկշռային շահույթըՙ 85,5 տոկոսով։ Մինչդեռ համակարգի առավել կարեւորագույն ոլորտներումՙ կապ, երկաթուղի, եկամուտներն աճել են 24,9 տոկոսով, հաշվեկշռային շահույթըՙ 95,2 տոկոսով։
Զգալի աճ է տեղի ունեցել երկաթուղային բեռնափոխադրումներումՙ նախորդ տարվա առաջին կիսամյակի համեմատությամբ աճելով 56,7 տոկոսով, իսկ բեռնաշրջանառության ծավալն աճել է 28,9 տոկոսով։ Հաշվետու ժամանակաշրջանում երկաթուղու բեռնափոխադրումների ծավալը կազմել է 854,7 հազ. տոննաՙ նախորդ տարվա նույն ժամանակաշրջանի 545,3 հազ. տոննայի դիմաց։ Աննախադեպ աճ է տեղի ունեցել հատկապես երկաթուղով ներհանրապետական բեռնափոխադրումների բնագավառում, որի ծավալը 2001 թ. առաջին կիսամյակի 85,6 հազ. տոննայի համեմատ աճել է 4 անգամՙ կազմելով 341,6 հազ. տոննա։ Փոխադրումների ծավալի վերոնշյալ աճը մասամբ պայմանավորված է վերջին ժամանակներում հանրապետությունում լեռնահանքային արդյունաբերության աշխուժացմամբ։ Ներկրվող բեռների ծավալն աճել է 14,8 տոկոսով։