ԿՐԱՍՆՈԴԱՐ, 21 ՕԳՈՍՏՈՍ, ՆՈՅՅԱՆ ՏԱՊԱՆ։ «Ռուսաստանի հարավի լավագույն ազգային հրատարակություն» կոչմանն է արժանացել Կրասնոդարում լույս տեսնող հայկական «Երկրամաս» թերթը։ Այս որոշումն ընդունել է «Ռուսաստանի հարավի անկախ լրագրողների ընկերակցություն» ոչ կառավարական հասարակական կազմակերպությունը, որ գործում է Ռոստովի մարզում։ Ինչպես ասվում է Ընկերակցության որոշման մեջ, «Երկրամաս» թերթը Ռուսաստանի հարավի միակ, իրոք անկախ եւ պրոֆեսիոնալ, ազգային հրատարակությունն է, որ հետեւողականորեն պաշտպանում է սեփական լսարանի շահերը»։ Թերթի խմբագրական կոլեգիան նշում է, որ «Երկրամասն» առաջին անգամ չէ, որ արժանանում է նման գնահատականի անկախ ռուսական կազմակերպությունների կողմից։ Այսպես, 2000 թվականին թերթի ինտերնետային էջը ճանաչվել է Ռուսաստանի ազգային համայնքային լավագույն էջը, իսկ 2001 թվականին «Երկրամաս» թերթը միակ ազգային հրատարակությունն էր, որ հրավիրվել էր մասնակցելու Մամուլի համառուսական կոնգրեսին եւ դարձել Երիտասարդ լրագրողների համառուսական խորհրդաժողովի դափնեկիր «Ազգային թեմա» նոմինացիայում։ Միեւնույն ժամանակ, Ռուսաստանում գործող հայկական կազմակերպությունների կողմից թերթի գործունեությունը դեռեւս որեւ կերպ չի գնահատվել։