Թենիսի ԱՄՆ-ի բաց առաջնությունում վերջապես կորտ դուրս եկան Սարգիս Սարգսյանն ու Դավիթ Նալբանդյանըՙ անցկացնելով առաջին փուլի հանդիպումը։ Այդ խաղում, հաշվի առնելով ընթացիկ մրցաշրջանի արդյունքները, հաղթողի հավակնորդ էր համարվում Դավիթը։ Սակայն Սարգիսը գերազանցեց բոլոր սպասելիքները եւ հաղթեց մրցակցին (6¬1, 6¬4, 6¬4)։ Հիշեցնենք, որ Դավիթ Նալբանդյանը հիանալի էր հանդես եկել «Մեծ սաղավարտի» նախորդ մրցաշարումՙ Ուիմբլդոնում, որտեղ միայն եզրափակիչում էր զիջել Լլեյթոն Հյուիթին։ Ուրախալի է, որ Դավիթն իր արմատներից չի կտրվել։ Ուիմբլդոնյան մրցաշարում լրագրողներից մեկին տված հարցազրույցում Դավիթ Նալբանդյանը նշել է. «Իմ ուժը գալիս է Հայաստանից, մի երկրից, որ տատիկս լքել է 18 տարեկանումՙ Ցեղասպանությունից փրկվելու համար»։ Անցյալ տարի Նալբանդյանը պայքարից դուրս էր մնացել 3-րդ փուլումՙ պարտվելով Եվգենի Կաֆելնիկովից։
Առաջին փուլի արգելքը հաջողությամբ հաղթահարողների մեջ են նաեւ Փիթ Սամփրասը, Գրեգ Ռուսեցկին, Ֆեռնանդո Գոնսալեսը, Թիմ Հենմանը, Ալեքսանդր Պոպը։
Կանանց մրցաշարում առաջին անակնկալի հեղինակ դարձավ ռուսաստանցի 19-ամյա թենիսիստուհի Ելենա Բովինան, որը երկրորդ փուլում պայքարից դուրս մղեց հարավսլավացի Ելենա Դոկիչին (6¬3, 6¬2)։ Հաջող էր նաեւ 17-ամյա Սվետլանա Կուզնեցովայի ելույթը, որը հաղթեց Ժանետ Հուսարովային։ Պայքարը շարունակում է նաեւ ռուսաստանցի Անաստասիա Միսկինան, որը պարտության մատնեց չեխ Դենիզա Խլադկովային։ Իսկ ահա Ռուսաստանի մյուս ներկայացուցիչներըՙ Դինարա Սաֆինան, Ելենա Լիխովցեւան, Ելենա Դեմենտեւան եւ Տատյանա Պանովան վերածվեցին հանդիսատեսի։ Դինարա Սաֆինան չկարողացավ լրջորեն դիմադրել Սերենա Ուիլյամսին (0¬6, 1¬6)։ Երրորդ փուլ են մտել Ստեֆանի Ֆորետցը, Սիլվիա Ֆարինան, Դայա Բեդանովան, Բիյա Բիլեկը, Նատալի Դեշին, Իվա Մայոլին, Ժյուստին Էնինը, Դանիելա Խանտուկովան։