Ինչպես տեղեկացանք ՀՀ ֆինանսների եւ էկոնոմիկայի նախարարության արտաքին կապերի եւ լրատվության վարչությունից, սեպտեմբերի 9-ին ֆինանսների եւ էկոնոմիկայի նախարար Վարդան Խաչատրյանն ընդունել է Միջազգային արժութային հիմնադրամի (ՄԱՀ) Հայաստանի գրասենյակի նորանշանակ ներկայացուցիչ Ջեյմս Մակհյուին։ Հանդիպման ընթացքում քննարկված հիմնական հարցը եղել է Հայաստանի ԲԷՑ-երի սեփականաշնորհումը։
Վարդան Խաչատրյանը տեղեկացրել է, որ «Միդլենդ ռիսորսըս» ընկերությունը պատրաստվում է ԲԷՑ-երի կառավարումը հանձնել էներգետիկայի ոլորտի հայտնի որեւէ ընկերության, որի անունը մոտ օրերս հայտնի կդառնա։ Ջեյմս Մակհյուի կարծիքով, դա կնպաստի հետագա աշխատանքներին։ Այդուհանդերձ, նա տեղեկացրել է, որ ՄԱՀ-ը եւ Համաշխարհային բանկն իրենց վերջնական կարծիքը կհայտնեն բաշխիչ ցանցերը հավատարմագրային կառավարման հանձնելուց հետո։
Անդրադառնալով SAC-V-ի եւ SAC-IV-ի «լողացող» մասնաբաժնի տրամադրմանը Հայաստանին, Ջեյմս Մակհյուն նշել է, որ այդ ժամկետները դեռեւս դժվար է ստույգ հայտնել։ Նա նաեւ հայտնել է, որ հոկտեմբեր-նոյեմբեր ամիսներին Հայաստան է ժամանելու ՄԱՀ-ի պատվիրակությունը։
Ա. Մ.