Նախագահ Ռոբերտ Քոչարյանը երեկ ընդունել է Վրաստանի պաշտպանության նախարար Դավիթ Թեւզաձեի գլխավորած պատվիրակությանը։
Զրույցի ընթացքում քննարկվել են հայ-վրացական երկկողմ հարաբերություններին, մասնավորապես պաշտպանության բնագավառում համագործակցությանը վերաբերող հարցեր։ Դավիթ Թեւզաձեի խոսքով, այդ հարաբերությունների զարգացման առումով շատ կարեւոր դեր է ունեցել Հայաստանի պաշտպանության նախարար Սերժ Սարգսյանի վերջերս Վրաստան կատարած պաշտոնական այցը։
Անդրադառնալով տարածաշրջանային խնդիրներին, զրուցակիցները շեշտել են Հարավ-Կովկասում տնտեսական փոխգործակցության զարգացման կարեւորությունը, նշելով, որ միայն այդ դեպքում տարածաշրջանի պետությունները գրավիչ կլինեն ներդնողների համար։
Վրաստանի պաշտպանության նախարարը ներկայացրել է նաեւ Պանկիսի կիրճի շուրջ վերջին զարգացումները։ Նա Հանրապետության նախագահին հանձնել է այդ խնդրի վերաբերյալ Վրաստանի նախագահ Էդուարդ Շեւարդնաձեի ուղերձը։
ՀՀ նախագահի մամլո գրասենյակ