Հայ օգնության ֆոնդի հայաստանյան մասնաճյուղի տնօրեն Գրիգոր Թաթուլյանը երեկ մամլո ասուլիս էր հրավիրելՙ ներկայացնելու «Մաթեւոսյան կրթավճար» ծրագիրը։ Արդեն 6 տարի սոցիալապես անապահով ընտանիքների 10 ուսանողների ծրագիրն ապահովում է 5 տարվա կրթաթոշակով։ Այս տարվա ընդունելության քննություններից հետո Հայաստանի գրեթե բոլոր մարզերից ու Երեւանից ծրագրին դիմել է 74 դիմորդ։ Պրն Թաթուլյանը նշեց, որ առաջին հերթին հաշվի են առնվում դիմորդների ընդունակություններն ու կարիքավոր լինելը։ Վճարովի համակարգ ընդունված առաջին կուրսեցիներին կրթաթոշակ է նշանակվում միմիայն նրանց սոցիալական վիճակի մասին մանրամասն տեղեկություններ ստանալուց հետո, քանզի քիչ չեն դեպքերը, երբ դիմորդների մեջ հայտնվում են շքեղ առանձնատներ ու ավտոմեքենաներ ունեցողները։ Այս տարի ընտրված 10 դիմորդներից 6-ը ԵՊՀ-ից են, 4-ըՙ տնտեսագիտության ինստիտուտից։ Եթե նախորդ տարիներին կրթաթոշակ էր տրվում միայն տնտեսագիտություն, կառավարում, միջազգային հարաբերություններ եւ լրագրություն մասնագիտություններին, ապա այս տարվանից բանասիրական ֆակուլտետի ուսանողները նույնպես հնարավորություն կստանան դրանից օգտվելու։ Ուսման ցածր առաջադիմություն ցուցաբերելու, վատ վարքի, նյութական վիճակի բարեփոխման դեպքերումՙ ընտրված ուսանողները դուրս են մնում ծրագրից։ Իսկ բարձր առաջադիմությամբ ավարտածները 5 տարի պարտադիր պետք է աշխատեն Հայաստանում։ Ի դեպ, այս տարի ծրագրին դիմած մնացած 64 ուսանողներից միայն 11-ն ուսման վարձը չեն մուծել։ Տնօրենը ցավ հայտնեց, որ իրենց հնարավորությունները թույլ չեն տալիս ավելի մեծ թվով կարիքավոր ուսանողների հովանավորել, իսկ, նրա ասելով, բարեգործական որեւէ այլ կազմակերպություն նման նախաձեռնությամբ հանդես չի գալիս։ «Մաթեւոսյան կրթավճար» ծրագրում ընդհանուր առմամբ ընդգրկված է 50 ուսանող, ասել է թեՙ նույնքան ընտանիք ազատվել է ուսման վարձ վճարելու ծանր ու դժվարին հոգսից։
Ծրագրի հովանավորությամբ վերանորոգված Վանաձորի թիվ 8 դպրոցը հոկտեմբերի սկզբին կվերանվանվի Անուշ Մաթեւոսյանի անվամբ։
Հայ օգնության ֆոնդը իրականացնում է նաեւ գիտական ծրագրեր, հովանավորում թափառաշրջիկ, մուրացիկ երեխաների կենտրոնին, մանկատան երեխաներին եւ Վանաձորի ծերանոցին։
ՌՈՒԶԱՆ ՊՈՂՈՍՅԱՆ