Հոկտեմբերի 25-ին Սլովենիայի Բլեդ քաղաքում կմեկնարկի շախմատի համաշխարհային հերթական օլիմպիադան։ Արդեն հայտնի են Հայաստանի տղամարդկանց (4 հիմնական, 2 պահեստային) եւ կանանց (3+1) հավաքականների կազմերը։ Մարզչական խորհրդի որոշմամբ շախմատի Հայաստանի ֆեդերացիան հաստատել է այն շախմատիստների ցանկը, որոնք մեր հանրապետության մարզական պատիվը կպաշտպանեն օլիմպիադայում։ Հարկ է նշել, որ ընտրությունը կատարվել է թեժ մրցակցության պայմաններում։ Հաշվի են առնվել թե շախմատիստների ցույց տված արդյունքները, թե նրանց փորձն ու հմտությունը։ Նախ նշենք, որ մեր ուժեղագույն շախմատիստներից Ռաֆայել Վահանյանը խնդրել է իրեն չընդգրկել ՀՀ հավաքականում։ Նրա բացակայությամբ ՀՀ հավաքականի կազմն այսպիսին է. Վլադիմիր Հակոբյան, Սմբատ Լպուտյան, Կարեն Ասրյան, Լեւոն Արոնյան, Աշոտ Անաստասյան, Արտաշես Մինասյան։ Ինչպես տեսնում եք, հավաքականում տեղ չգտնվեց ամիսներ առաջ գրոսմայստերի կոչմանն արժանացած Գաբրիել Սարգսյանի համար, որը վերջերս ավարտված Հայաստանի տղամարդկանց բարձրագույն խմբի առաջնությունում գրավել էր 2-րդ տեղըՙ միայն լրացուցիչ ցուցանիշներով զիջելով երկրի չեմպիոն Լեւոն Արոնյանին։ Տղամարդկանց հավաքականի մարզիչն է Արշակ Պետրոսյանը։ Այս օրերին հավաքականի անդամներից երկուսըՙ Սմբատ Լպուտյանն ու Վլադիմիր Հակոբյանը, տարբեր թիմերի կազմերում մասնակցում են շախմատի չեմպիոնների գավաթի խաղարկությանը։ Սմբատը հանդես է գալիս Բոսնիայի «Կիսելյակի» կազմում, իսկ Հակոբյանըՙ Կազանի «Լադյայում», Լեւոն Արոնյանը Բոխումի թիմի կազմում մասնակցում է Գերմանիայի բունդեսլիգայի առաջնությանը։
Կանանց հավաքականի մարզիչ, գրոսմայստեր Արսեն Եղիազարյանը թիմում ընդգրկել է գրոսմայստերներ Էլինա Դանիելյանին, Լիլիթ Մկրտչյանին, միջազգային վարպետ Գոհար Հլղաթյանին եւ վարպետ Լիլիթ Գալոյանին։ Վերջինս ընթացիկ մրցաշրջանում հաջող մրցելույթներ է ունեցել։ Մասնավորապես, Հայաստանի առաջնությունում Լիլիթը հասավ մինչեւ եզրափակիչ, որտեղ պարտվեց Էլինա Դանիելյանից։
Հուսանք, որ մեր թե տղամարդկանց եւ թե կանանց հավաքականները պատշաճ մակարդակով հանդես կգան շախմատի համաշխարհային օլիմպիադայում։