Լոնդոնահայ հայտնի գործարար եւ բարերար Վաչե Մանուկյանը հոկտեմբերի 1-ի երեկոյան պատվավոր ընդունելության է արժանացել Հարվարդի համալսարանում, Ջոն Քենեդու անվան կառավարման ֆակուլտետում, «Ազգին» հաղորդում են Բոստոնից։ Համալսարանի նախագահ Լոուրենս Սամըրզը եւ նշյալ ֆակուլտետի դեկան դոկտ. Ջոզեֆ Նայը կոկտեյլ ընդունելության եւ դրան հետեւած ընթրիքի ընթացքում գովեստով են արտահայտվել Հարվարդի Ջ. Քենեդու անվան կառավարման դպրոցում Հայաստանի համար հասարակական ծառայության կրթական ծրագիր հաստատելու Վ. Մանուկյանի գաղափարի մասին։ Այդ ծրագրով նախատեսվում է հայկական ծագումով առնվազն տարեկան 2 ուսանողի լրիվ կրթաթոշակ շնորհել կառավարման դպրոցում սովորելու համար։
Թեեւ ընդունելության ժամանակ ոչինչ չի ասվել ծրագրի հաստատման նյութական կողմի մասին, սակայն այլ աղբյուրից տեղեկանում ենք, որ պրն Մանուկյանը 1 մլն դոլար է հատկացրել այդ նպատակին։
Հետաքրքրական պիտի լիներ նաեւ նշել, որ ընդունելությանն այլ հրավիրյալների կարգին ներկա են գտնվել նաեւ Հայաստանի նախկին վարչապետ եւ Լոնդոնում նախկին դեսպան Արմեն Սարգսյանն ու Կանադայում Հայաստանի նախկին դեսպան եւ նախկին նախարար Գառնիկ Նանագուլյանը։ Անշուշտ, հետաքրքրական է պրն Մանուկյանի այս առանձնահատուկ վերաբերմունքն այս եւ այլ նախկինների նկատմամբ, սակայն տվյալ պարագայում մեզ հետաքրքրում է Հարվարդում հայ ապագա քաղաքագետներ պատրաստելու նրա գովելի նախաձեռնությունը։