Էրեբունի-Երեւան տոնակատարության գլխավոր իրադարձությունները կմեկնարկեն այսօր, ժամը 11-ից։ Նուբարաշենի համայնքումՙ Կենտրոնական զբոսայգում տեղի կունենա միջոցառում, որ նաեւ նվիրված կլինի Նուբարաշենի 70-ամյակին։ Միջոցառմանը կմասնակցի Երեւանի քաղաքապետ Ռոբերտ Նազարյանը։ Ժամը 17։30-ին էրեբունի ամրոցի մոտ կկազմակերպվի թատերական ներկայացում։ Ժամը 19-ին Հանրապետության հրապարակը «ծանրաբեռ» կլինի հանրապետության տարբեր մարզերից բերած բերք ու բարիքով, բնականաբար, նաեւ համտեսում կլինի։ Տոնակատարության եզրափակիչ համերգը Հանրապետության հրապարակում կկայանա ժամը 20-ին, որի ընթացքում քաղաքապետ Ռոբերտ Նազարյանը պատվավոր քաղաքացու կոչումներ կշնորհի արժանավորներին։ Արարողությանը ներկա կգտնվեն նախագահ Ռոբերտ Քոչարյանը եւ Ռուսաստանի առաջին նախագահ Բորիս Ելցինը։ Եվ ինչպես միշտ, երեկոն կեզրափակվի տոնական հրավառությամբ։