ԵՐԵՎԱՆ, 5 ԴԵԿՏԵՄԲԵՐ, ՆՈՅՅԱՆ ՏԱՊԱՆ։ «Սփյուռ» տեղեկատվական ծառայությունը դեկտեմբերի 5-ին նշեց իր գործունեության 10-ամյակը։ Ըստ ծառայության տնօրեն Աշոտ Գրիգորյանի, 1992 թ.-ից «Սփյուռն» իրականացնում է Հայաստանի ձեռնարկությունների եւ կազմակերպությունների մասին տեղեկությունների հավաքում, մշակում եւ տարածում։ Ներկայումս ծառայությունում գրանցված են մոտ 4000 ձեռնարկություններ։ Տեղեկատվական ծառայությունը գործում է անվճար հեռախոսային կապով, պարբերաբար հրատարակվող տեղեկագրքերի, ինտերնետ ցանցի միջոցով։ Ա. Գրիգորյանը տեղեկացրեց, որ «Սփյուռը» առաջիկայում կինտեգրվի «Քոմփաս» միջազգային տեղեկատվական համակարգում, ինչը հնարավորություն կտա Հայաստանի ձեռնարկությունները ներկայացնել արտերկրում, իսկ արտերկրի ձեռնարկություններըՙ Հայաստանում։ Նախատեսվում է նաեւ հայերենով հրատարակել «Գործարար տեղեկատու», որի անգլերեն եւ ռուսերեն լեզուներով տարբերակներն արդեն լույս են տեսել։