Մարզային տպագիր լրատվամիջոցների առաջարկությամբ նախագահ Ռոբերտ Քոչարյանը հանդիպում է ունեցել հանրապետության մարզերում լույս տեսնող մեկ տասնյակից ավելի թերթերի խմբագիրների հետ, տեղեկացնում է ՀՀ նախագահի մամլո գրասենյակը։ Հանդիպմանը մասնակցել է նաեւ Ժուռնալիստների միության նախագահ Աստղիկ Գեւորգյանը։
Նշելով, որ սա նման առաջին հանդիպումն է, հանրապետության նախագահն ասել է, որ երեւանյան լրատվամիջոցների ղեկավարների հետ տարբեր առիթներով հաճախակի է հանդիպումներ ունենում։ Ռոբերտ Քոչարյանը հատկապես հետաքրքրական է համարել մարզային հայացքը հանրապետությունում տեղի ունեցող իրադարձություններինՙ նկատի առնելով նաեւ, որ առաջիկա նախագահական ու խորհրդարանական ընտրությունների հետ կապված սկսվում է պատասխանատու ժամանակահատված։
Հանդիպման ժամանակ քննարկվել են մարզերում լույս տեսնող թերթերի առջեւ ծառացած հիմնախնդիրները եւ դրանց լուծման հնարավորությունները։ Լրագրողների խնդրանքով երկրի ղեկավարն անդրադարձել է նաեւ հանրապետության տնտեսական վիճակին եւ զարգացման ծրագրերին։
Մարզային թերթերի խմբագիրները ցանկություն են հայտնել, որ երեւանյան լրատվամիջոցների հետ արդեն ավանդական դարձած շփումների օրինակով, հանրապետության նախագահը պարբերաբար հանդիպումներ ունենա նաեւ մարզային լրատվամիջոցների ղեկավարների հետ։