ԲԱՔՈՒ, 17 ԴԵԿՏԵՄԲԵՐ, ՆՈՅՅԱՆ ՏԱՊԱՆ։ Ինչպես հաղորդում է Բաքվի «525» թերթը, դեկտեմբերի 13-ին «հայկական զինված կազմավորումների կողմից հրադադարի ռեժիմի խախտման հետեւանքով» ադրբեջանցի մի զինվոր զոհվել է եւ մեկը վիրավորվել։ Թերթի համաձայն, «Հայաստանի զինված ուժերի ստորաբաժանումները Ղազախի շրջանի օկուպացված Բաղանիս-Այրում գյուղի կողմից գնդակոծության են ենթարկել Ադրբեջանի զինված ուժերի դիրքերըՙ Ղուշչու-Այրում գյուղի մոտակայքում»։
Մինչդեռ, Ադրբեջանի ՊՆ-ում եւ ծառայության վայրում զինվորների մահը բացատրում են ինքնասպանությամբ։ Ինչպես հաղորդում է «Էմ Փի Էյ»-ըՙ վկայակոչելով «Զինվորի ընտանիք» կազմակերպությանը, օրերս Ադրբեջանի գլխավոր հրամանատարին ուղերձ է հղվել զինվորների ինքնասպանությունների պատճառները պարզաբանելու պահանջով։ Այդ առնչությամբ դեկտեմբերի 18-ին, ժամը 12.00-ին «Զինվորի ընտանիք» կազմակերպությունը մտադիր է պիկետ կազմակերպել նախագահական վարչակազմի շենքի դիմաց, հաղորդում է գործակալությունը։