Ավարտվեց համահայկական մանկապատանեկան երգի «Արեւիկ-քենդի» մրցույթ-փառատոնը, որն անցկացվում էր Հայաստանի ամերիկյան համալսարանի դահլիճում։ Միջոցառման հովանավորը «Գրանդ քենդի» համատեղ ձեռնարկությունն էր, նախագծի իրականացմամբ զբաղված էր Հանրային հեռուստատեսության եւ ռադիոյի «Արեւիկ» մանկական համույթը։ Մրցույթը հաջող էր, դահլիճըՙ լեփ-լեցուն, շատ էին նոր ու լավ երգերը։ Ուրախալի է, որ մրցույթն արդեն դարձել է ավանդական եւ հետզհետե ժողովրդականություն է նվաճում։ Թեեւ առաջին անգամ անցկացվել է անցյալ տարի։
Դեկտեմբերի 21-ն ամբողջ տարին անցկացված մրցույթի եզրափակիչ մասն էր, որը հաղթողներին ի հայտ բերեց երգերի բազմաթիվ հեղինակների մեջ։ Հինգբալանոց հաղթողներին որոշեց ժյուրին, որի մեջ էին «Գրանդ քենդի» ընկերության եւ «Հայրենիք» մանկական հեռուստաալիքի նախագահ Կարեն Վարդանյանը, Հայաստանի հանրային ռադիոյի տնօրեն եւ «Արմենակոբ» հեռուստաալիքի նախագահ Արմեն Ամիրյանը, մշակույթի, սպորտի եւ երիտասարդության հարցերի փոխնախարար Ալիս Ադամյանը, «Հայրենիք» հեռուստաալիքի գործադիր տնօրեն Վլադիմիր Օհանյանը եւ ուրիշներ։
Մանկական երգի անվանակարգով 500 դոլարանոց մեծ մրցանակը շնորհվեց կոմպոզիտոր Լիլիթ Համբարյանին «Նապաստակի օրորոցը» երգի համար, որը կատարեց նրա դուստրըՙ «Արեւիկի» ամենափոքրիկ մասնակից Տաթեւիկը։ Պատանեկան երգի անվանակարգով մեծ մրցանակ ստացավ պատանի կոմպոզիտոր Ռաֆայել Իսահակյանի «Հոգու երգը»։ Այն հրաշալի կատարեց 15-ամյա Անի Հովհաննիսյանը։ Ժողովրդական երգի մշակման անվանակարգով մրցանակներ շնորհվեցին կատարողներին։ Մեծ մրցանակ ստացավ «Կոտ ու կես» ժողովրդական երգը կատարած Քրիստինե Առաքելյանը։ Բոլոր անվանակարգերով դրամական մրցանակներ հանձնվեցին նաեւ առաջին, երկրորդ եւ երրորդ տեղերը գրավողներին։
Միջոցառումն ամբողջությամբ կցուցադրվի «Հայրենիք» հեռուստաալիքով, մասնակիորենՙ «Արմենակոբ», «Պրոմեթեւս» ալիքներով եւ Հանրային հեռուստատեսությամբ։
«Արեւիկ» համույթի գեղարվեստական ղեկավար, մրցույթի գաղափարի հեղինակ Արմեն Դիվանյանի խոսքերով, այս փառատոնը նպաստում է նոր երգերի ստեղծմանը եւ դրանով իսկ երկրում նոր ու անհայտ տաղանդավոր կոմպոզիտորների ու ստեղծագործողների բացահայտմանը։
ՏԻԳՐԱՆ ՀՈՎՀԱՆՆԻՍՅԱՆ, Հայաստանում Ինտերֆաքսի սեփ. թղթակից