Փետրվարի 5¬15-ն Արարատի «Այգ» մարզաբազայում կանցկացվի ազատամարտիկ Արշակ Հովհաննիսյանի հուշամրցաշարը, որն ուժերի լավ ստուգատես կհանդիսանա նոր մրցաշրջանին նախապատրաստվող ֆուտբոլային թիմերի համար։ Մասնակից 7 թիմերը բաժանվել են 2 ենթախմբերի։ Առաջինում ընդգրկվել են «Փյունիկը», «Կիլիկիան», «Դինամոն» եւ «Միկան», երկրորդում հանդես կգան «Արաքսը», «Լեռնային Արցախը» եւ «Շիրակը»։ Խմբերում լավագույնը ճանաչված երկուական թիմերը փետրվարի 12-ին կմրցեն կիսաեզրափակիչում։ Փետրվարի 14-ին կկայանա 3-րդ տեղի համար հանդիպումը, իսկ հաջորդ օրը եզրափակիչում կվճռվի հաղթողի հարցը։ Վճռորոշ հանդիպումները կսկսվեն ժամը 15-ին։ Մասնակից թիմերից յուրաքանչյուրը 50 հազար դրամ մուտքավճար է վճարելու։ Հաղթող թիմը պարգեւատրվելու է 50 հազար դրամով, 2-րդ եւ 3-րդ տեղերը զբաղեցրած թիմերին կհանձնվի համապատասխանաբար 30 եւ 20 հազար դրամ։ Բացի այդ, սահմանված են նաեւ հատուկ մրցանակներ խաղային առանձին օղակների լավագույն ֆուտբոլիստներին, լավագույն ռմբարկուին, որոնք մրցումների փակման հանդիսավոր արարողության ժամանակ աչքի ընկածներին կհանձնեն Արշակ Հովհաննիսյանի հարազատները։ Մրցաշարը կազմակերպել է Արարատի «Այգ» մարզաբազայի տնօրեն, «Արաքս» ակումբի նախագահ Աբրահամ Բաբայանը։
«Այգ» մարզաբազայում 10-օրյա ուսումնամարզական հավաք կանցկացնեն մրցավարներըՙ զուգահեռաբար սպասարկելով մրցաշարի հանդիպումները։ Ինչպես «Ազգի» թղթակցին հայտնեց հավաքի ղեկավար, ՀՖՖ-ի մարզական բաժնի մրցավարական բաժանմունքի պետ Մաթեւոս Մկրտչյանը, հավաքում ընդգրկվել են 23 մրցավարներ, որոնցից 12-ը ներկայացնում են հանրապետության տարբեր մարզերը։ Նրանք նախապատրաստվելու են հատուկ ծրագրով, իսկ վերջում քննություն են հանձնելու ինչպես խաղի կանոններից, այնպես էլ ֆիզիկական պատրաստությունից (50, 200 մ վազքեր, Կուպերի տեստ)։ Հավաքի արդյունքների հիման վրա էլ կորոշվեն առաջնության խաղերը սպասարկող մրցավարները։
Ներկայացնում ենք նախնական փուլի խաղացանկը.
Փետրվարի 5-ին
«Կիլիկիա»¬«Փյունիկ» - 13.00
«Դինամո»¬«Միկա» - 16.00
Փետրվարի 6-ին
«Արաքս»¬«Արցախ» - 15.00
Փետրվարի 7-ին
«Կիլիկիա»¬«Դինամո» - 13.00
«Փյունիկ»¬«Միկա» - 16.00
Փետրվարի 8-ին
«Շիրակ»¬«Արաքս» - 15.00
Փետրվարի 9-ին
«Փյունիկ»¬«Դինամո» - 13.00
«Կիլիկիա»¬«Միկա» - 16.00
Փետրվարի 10-ին
«Արցախ»¬«Շիրակ» - 15.00