Ամենայն հայոց կաթողիկոս Ն.Ս.Օ.Տ.Տ Գարեգին Երկրորդըՙ Արցախի թեմի առաջնորդ Պարգեւ արքեպիսկոպոս Մարտիրոսյանի, Արարատյան թեմի առաջնորդ Նավասարդ եպիսկոպոս Կճոյանի եւ Մայր Աթոռի դիվանապետ Արշակ վարդապետ Խաչատրյանի ուղեկցությամբ, երեկ այցելել է նախագահ Ռոբերտ Քոչարյանին եւ իր հայրապետական մաղթանքն է հաղորդել նրան։
Շնորհավորելով Ռոբերտ Քոչարյանին Հայաստանի Հանրապետության նախագահի պաշտոնում վերընտրվելու կապակցությամբ, բարձրաստիճան հոգեւորականները երկրի ղեկավարին մաղթել են հետագա արգասաբեր գործունեություն եւ համազգային նպատակների իրականացում։ Վեհափառ Հայրապետը նշել է, որ եկեղեցին իր ողջ կարելիությամբ պատրաստ է զորավիգ լինել հայրենի պետականությանը։
Հանդիպման մասնակիցները կարեւորել են երկրում բարոյահոգեբանական առողջ միջավայրի, հանդուրժողականության եւ համերաշխության մթնոլորտի ձեւավորումը։