Երեկ Թեքեյան կենտրոնում տեղի ունեցավ հանդիպում ՀՌԱԿ ատենապետ Ռուբեն Միրզախանյանի եւ ԱՄՆ դեսպանատան գյուղդեպարտամենտի մարկետինգի աջակցության ծրագրի տնօրեն դոկտոր Ալըն Լեյնսի միջեւ։
Պրն Լեյնսը ներկայացրեց իր ղեկավարած ծրագրի գործունեությունը, որը շուրջ 10 տարի տարբեր տեսակի աջակցություն եւ օգնություն է հատկացնում Հայաստանում նորաստեղծ ֆերմերային տնտեսություններին։
Պրն Լեյնսը տեղեկացրեց, որ Հայաստանի բոլոր մարզերում ունեն իրենց ստորաբաժանումները, ստեղծել են 40 վարկային ակումբներ, որոնցում ընդգրկված է 600 ընտանիք։ Նման լայնածավալ գործունեությունից զատ, համագործակցում են գյուղակադեմիայի եւ մի շարք գիտահետազոտական ինստիտուտների հետՙ ֆինանսավորելով հետազոտություններ, որոնք ընտրվում են մրցութային կարգով։
Այնուհետեւ ՀՌԱԿ ատենապետ Ռուբեն Միրզախանյանը պրն Լեյնսին ներկայացրեց կուսակցության առաջիկա անելիքները գյուղատնտեսական ոլորտումՙ Ռուսաստանի հայերի միության հետ համատեղ։
Կողմերը պայմանավորվեցին հանդիպումները դարձնել շարունակական։
Հանդիպմանը մասնակցում էին նաեւ ՀՌԱԿ փոխատենապետներ Հարություն Առաքելյանը, Մեխակ Գեւորգյանը, ատենադպիր Մեսրոպ Հարությունյանը եւ վարչության անդամ Կարեն Կակոյանը։