«Գաֆեսճյան թանգարան» հիմնադրամի կողմից Երեւանում «Ջերարդ Լ. Գաֆեսճյան» ժամանակակից արվեստի թանգարանի շենքի կառուցման 25 մլն դոլար արժողությամբ ծրագրի իրականացման համար հայտարարված միջազգային ճարտարապետական նախագծային մրցույթի եզրափակիչ փուլ են դուրս եկել երեք ընկերություններ։ Ինչպես նշված է հիմնադրամից «Ազգ»-ին տրամադրված հաղորդագրությունում, Նյու Յորքից եւ Փարիզից «Բերնարդ Թչումի ճարտարապետները» (Bernard Tschumi Architects), Վիեննայից «Քուփ Հիմելբլաու» (Coop Himmelblau) կազմակերպությունը եւ Հոլանդիայի Ռոտերդամ քաղաքից «Էմ-Վի-Ար-Դի-Վի» կազմակերպությունը (MVRDV) հիշյալ փուլի նախագծերը պետք է ներկայացնեն մինչեւ սույն թվականի մայիսի 23-ը, ինչից հետո կարճ ժամկետում կհայտարարվի հաղթող կազմակերպության անունը։
Թանգարանը, որի կառուցումը նախատեսված է 2004-2006 թթ., ցուցանմուշների ֆոնդում ընդգրկելու է Գաֆեսճյանի ապակու արվեստի նշանավոր հավաքածունՙ ներառյալ հանրահայտ արվեստագետներ Ստանիսլավ Լիբենսկիի, Յարոսլավա Բրիխտովայի ստեղծագործություններից։ Մշտական ցուցադրանքում կներառվի 20-րդ դարի ականավոր արվեստի գործերի մի ընդարձակ շարքՙ գեղանկարչությունից եւ քանդակից։ Միաժամանակ, թանգարանը կհյուրընկալի միջազգային նշանակության շրջիկ ցուցահանդեսներ։