ՀՀ պաշտպանության նախարար Սերժ Սարգսյանի հրավերով եռօրյա պաշտոնական այցով ապրիլի 21-ին Երեւան ժամանեց Լիտվայի Հանրապետության պաշտպանության նախարար Լինաս Լինկեւիչուսի գլխավորած պատվիրակությունը։
Երեկոյան պատվիրակությանն ընդունեց ՀՀ պաշտպանության նախարար Սերժ Սարգսյանը։ Հանդիպման ընթացքում քննարկվեցին անցած տարի ՀՀ պաշտպանության նախարարիՙ Լիտվա կատարած այցի ընթացքում ձեռք բերված պայմանավորվածությունների շրջանակներում համագործակցության զարգացման խնդիրները։ Մասնավորապես, գնահատվեցին ՆԱՏՕ-ի «Գործընկերություն հանուն խաղաղության» ծրագրի շրջանակներում ռազմական կրթության, խաղաղապահության, բանակաշինության բնագավառներում փորձի փոխանակման, համագործակցության հնարավորությունները։ Զրուցակիցները ներկայացրեցին Բալթյան եւ Հարավկովկասյան տարածաշրջաններում ռազմաքաղաքական իրավիճակը, կարծիքներ փոխանակեցին միջազգային վերջին զարգացումների շուրջ։
ՀՀ ՊՆ Լրատվության եւ քարոզչության վարչություն