ԲՐՅՈՒՍԵԼ, 27 ՀՈՒՆԻՍ, ՆՈՅՅԱՆ ՏԱՊԱՆ - ԱԶԱՏՈՒԹՅՈՒՆ։ Եվրամիությունում նախագահող Հունաստանը հունիսի 27-ին խստորեն քննադատել է Հայաստանում կայացած խորհրդարանական ընտրություններըՙ փաստելով, որ դրանք ուղեկցվել են կեղծիքներով ու մարդկանց վախեցնելով։ Եվրամիությունը ափսոսանք է հայտնել, որ ընտրական գործընթացն ընդհանուր առմամբ չի համապատասխանել միջազգային չափանիշներին մի քանի առանցքային կետերով, ասված է Եվրամիության նախագահության հայտարարությունում։ Եվրամիությունը առանձնապես մտահոգ է քվեների հաշվարկման ժամանակ թույլ տրված կեղծիքներով, ընտրական հանձնաժողովների չհավասարակշռված կազմով, վստահված անձանց վախեցնելով, քվեարկության արդյունքների հրապարակման ժամանակ թափանցիկության բացակայությամբ, ասվում է փաստաթղթում։ Խնդիրները չեն վերացել, չնայած Հայաստանը խոստացել էր ապահովել թափանցիկություն փետրվարին կայացած նախագահական ընտրություններից հետո, ասված է ԵՄ հայտարարության մեջ։