68 շրջանավարտ ԵՊՀ աստվածաբանության ֆակուլտետից
Հուլիսի 8-ին ԵՊՀ-ի հիմնադիր մասնաշենքում հանձնվեցին աստվածաբանության ֆակուլտետի բակալավրիատի եւ մագիստրատուրայի 68 շրջանավարտների ավարտական վկայականները։ Ողջույնի խոսքով հանդես եկավ ԵՊՀ ռեկտոր, ակադեմիկոս Ռադիկ Մարտիրոսյանը։ Նա, հանձնելով ավարտական վկայականները, շնորհավորեց շրջանավարտներին եւ բարի երթ մաղթեց նրանց։ Ի խորոց սրտի խոսք ասացին ֆակուլտետի հիմնադիր դեկան Շահե արք. Աճեմյանը, ակադեմիկոս Վլ. Բարխուդարյանը։ Դահլիճում հավաքվածներին եւ նորընծա աստվածաբաններին Ամենայն հայոց հայրապետի օրհնանքը փոխանցեց Արարատյան թեմի առաջնորդական փոխանորդ Նավասարդ արք. Կճոյանը։
Անհավատալի էր թվում, թե 1995 թ. ընդամենը 25 ուսանողներով սկսող նորահաստատ, շատերի համար օտար եւ նույնիսկ անընդունելի աստվածաբանության ֆակուլտետն այսօր արդեն հարյուրավոր շրջանավարտներ պիտի ունենար եւ մեծ ճանաչում թե՛ հանրապետության բուհական համակարգում, թե՛ սփյուռքում եւ թե՛ եվրոպական մեծանուն համալսարանների շրջանում։ Առ այսօր աստվածաբանության ֆակուլտետն ավարտել են 325 ուսանողներ, որոնցից շատերին հնարավորություն է ընձեռվել սովորելու եվրոպական տարբեր համալսարաններում։ Շատերն էլ աշխատում են կիրակնօրյա եւ հանրակրթական դպրոցներում, Մայր աթոռ Սբ. Էջմիածնում, Արարատյան թեմի առաջնորդարանում եւ եկեղեցական տարբեր թեմերում։ Այս տարվա շրջանավարտները հրավեր են ստացել ուսումը շարունակելու Ստրասբուրգի եւ Հոլանդիայի համալսարաններում։
ԵՊՀ լրատվական ծառայություն