ՄՈՍԿՎԱ, 8 ՀՈՒԼԻՍ, ՆՈՅՅԱՆ ՏԱՊԱՆ։ Ինչպես հաղորդում են ռուսական լրատվամիջոցները, Երեւանի հեռուստաաշտարակի 130 մետր բարձրության վրա մոնտաժվել եւ շահագործման է հանձնվել «Միր» ՄՀՌԸ հաղորդիչը։ Հայաստանի բնակիչները իրենց հեռուստացույցների էկրանին առայժմ կարողացել են տեսնել միայն «Միրի» «պատկերը»։ Աշնանը կսկսվեն «Միր» հեռուստաալիքի 6-ժամանոց կանոնավոր հեռարձակումները Հայաստանում։ Սա առաջին քայլն է ԱՊՀ մասնակից պետությունների կառավարությունների ղեկավարների խորհրդի 2002 թվականի հոկտեմբերի 7-ի «Հիմնադիր պետություններում «Միր» ՄՀՌԸ հետագա գործունեության մասին» որոշման իրականացման գործում եւ սեփական հեռուստաեթերով լիամասշտաբ աշխատանքի առաջին փորձը։ Հաջորդ քայլը կլինի «Միրի» հայտնվելը Ղրղզստանի, Բելառուսիայի եթերում, իսկ հաջորդ տարվանից Ղազախստանում, Տաջիկստանում, Մոլդավիայում եւ Ադրբեջանում։ Ընկերությունը ծրագրում է սեփական հեռուստա- եւ ռադիոհեռարձակում հիմնադիր բոլոր երկրներում օրական առնվազն 18 ժամ ծավալով։