Հուլիսի 8-ին Եվրոպայի հայկական միությունների ֆորումի քաղաքական խորհրդի անդամ եւ Շվեդիայի հայկական միությունների համադրող կենտրոնի նախագահ Կարո Հակոբյանը հանդիպեց Հայաստանի արտաքին գործերի նախարար Վարդան Օսկանյանի հետ։ Հանդիպման ընթացքում նա նախարարին ներկայացրեց վերջերս Եվրոպայում Հայոց ցեղասպանության ճանաչման ուղղությամբ ծավալած գործունեությունը։ Մասնավորապես, նախարարին համառոտ ներկայացվեցին սույն թվականի հունիսի 18-19-ը Բրյուսելում տեղի ունեցած Հայոց ցեղասպանությանը նվիրված փաստավավերագրական լուսանկարների ցուցահանդեսը եւ գիտաժողովը, ինչպես նաեւ Եվրոպայի տարածքում գործող հայկական միությունների եւ կազմակերպությունների գործունեությունը։
Պրն Հակոբյանն անդրադարձավ նաեւ Եվրոպայի հայկական միությունների ֆորումի աշխատանքային ընթացքի առկա վիճակին եւ արդյունավետ գործունեության խնդիրներին։ Նա պրն Օսկանյանին տեղեկացրեց ֆորումի արտահերթ ընդհանուր ժողովի մասին, որը տեղի կունենա սեպտեմբերի վերջինՙ Բրյուսելում։
Շվեդիայի հայկական միությունների համադրող կենտրոն