ՍՏԵՓԱՆԱԿԵՐՏ, 1 ՍԵՊՏԵՄԲԵՐ, ՆՈՅՅԱՆ ՏԱՊԱՆ։ Նոր ուսումնական տարվա առաջին պարապմունքը Լեռնային Ղարաբաղի դպրոցներում եւ բուհերում նվիրված էր Լեռնային Ղարաբաղի Հանրապետության հռչակման օրվան։ Ավանդույթի համաձայն, այդ պարապմունքներն անցել են հանրապետության Անվտանգության խորհրդի, խորհրդարանի եւ կառավարության ներկայացուցիչների մասնակցությամբ։ Կազմակերպվել են հանդիպումներ Արցախյան ազգային-ազատագրական շարժման ակտիվիստների հետ, անցկացվել են ռազմահայրենասիրական պարապմունքներ։
Ինչպես նշված է ԼՂՀ ԱԳՆ տեղեկատվական-վերլուծական վարչության հաղորդագրության մեջ, տոնական միջոցառումների հիմնական մասը կանցկացվի սեպտեմբերի 2-ինՙ ԼՂՀ հռչակման օրը։ Հանդիսությունները կսկսվեն Շուշիի Ղազանչեցոց եկեղեցում սուրբ պատարագով եւ հովվապետական օրհնությամբ։ ԼՂՀ բարձրաստիճան ղեկավարության եւ պաշտպանության բանակի հրամանատարության, հասարակայնության ներկայացուցիչները կայցելեն Ստեփանակերտի հուշահամալիրՙ հարգանքի տուրք մատուցելու Մեծ հայրենականի եւ Ղարաբաղյան պատերազմի հերոսների հիշատակին։ Հանրապետության մայրաքաղաքում եւ շրջկենտրոններում կկազմակերպվեն զինվորական շարասյուների երթեր։
Ստեփանակերտ քաղաքի «Վերածնունդ» հրապարակում եւ Ստեփան Շահումյանի անվան հանրապետական մարզադաշտում Հայաստանի էստրադային աստղերի եւ տեղական համույթների մասնակցությամբ կկայանան համերգներ, ինչպես նաեւ սպորտային մրցումներ։