ԷՍԵՆՏՈՒԿԻ, 23 ՍԵՊՏԵՍԲԵՐ, ԱՐՄԵՆՊՐԵՍ։ Ստավրոպոլի երկրամասում հանցախումբ կազմակերպելու կասկածանքով երկուշաբթի օրը ձերբակալվել է Բուդյոնովսկ քաղաքի միլիցիայի պետ Ռուսլան Գեւորգյանը։ Ինչպես ԻՏԱՌ-ՏԱՍՍ-ին հայտնել են Ստավրոպոլի երկրամասի անվտանգության դաշնային ծառայության վարչության մամուլի ծառայությունում, ներքին գործերի վարչության պետից բացի, ձերբակալվել են նաեւ նույն այդ ներքգործշրջբաժնի հարկային հանցագործությունների դեմ պայքարի եւ տնտեսական հանցագործությունների դեմ պայքարի բաժինների պետերը, ինչպես նաեւ տեղացի երեք ձեռնարկատերեր Բոբրյաշովը, Հարությունյանը եւ Գրիգորյանը։ Նրանք բոլորը կասկածվում են հանցախումբ կազմակերպելու, ծառայողական լիազորությունները գերազանցելու, խարդախության եւ ապօրինի ձեռնարկչությամբ զբաղվելու մեջ։
Ինչպես այսօր լրագրողներին հայտնել է ՌԴ ներքին գործերի նախարար Բորիս Գրիզլովը, գործողությունն անցկացրել են ներքգործնախարարության սեփական անվտանգության վարչության աշխատակիցներըՙ անվտանգության դաշնային ծառայության եւ գլխավոր դատախազության ներկայացուցիչների հետ համատեղ։
Հանցավոր խմբի քրեական գործի հետաքննության շրջանակներում, ասել է նախարարը, արդեն կատարվել է 14 խուզարկություն, այդ թվումՙ Ռուսլան Գեւորգյանի երեք տներում։ Ընդհանուր առմամբ առգրավվել է ավելի քան 1 մլն դոլար, 7 մլն ռուբլի, 5 կիլոգրամ ոսկեղեն, 5 միավոր չգրանցված զենք ու պայթանյութ։
Գրիզլովի տվյալներով, այս հանցավոր խմբի բացահայտման ուղղությամբ աշխատանք էր կատարվում մեկ տարվա ընթացքում։ Նա նշել է, որ ձերբակալվածները կասկածվում են խոշոր չափերով դրամական միջոցների հափշտակման մեջ։ «Նրանք ստեղծել էին էթիլային սպիրտի արտադրության ձեռնարկություն, որը չէր գրանցվել եւ հարկեր չէր վճարում», նշել է ներքգործնախարարը։ Օրական արտադրվում էր մինչեւ 30 տոննա սպիրտ, որն իրացվում էր առեւտրային կառույցներում։ «Այդ հափշտակումը ելուզակներին թույլ է տվել հսկայական գումարներ կուտակել։ Բացի այդ, նրանք զբաղվում էին մտացածին պատրվակներով քրեական գործերի հարուցմամբ եւ դրանց դադարեցման համար կաշառքներ էին վերցնում», ընդգծել է Գրիզլովը։