Լոս Անջելեսից «Ազգին» տեղեկացնում են, որ առաջիկա հոկտեմբերի 23-նոյեմբերի 3-ը Մ. Նահանգներ է այցելելու Լեռնային Ղարաբաղի Հանրապետության նախագահ Արկադի Ղուկասյանը։ Հաջորդաբար Նյու Յորքում, Սան Ֆրանցիսկոյում, Ֆրեզնոյում, Լոս Անջելեսում եւ Բոստոնում Արկադի Ղուկասյանը հանդիպումներ է ունենալու ամերիկահայ գլխավոր կազմակերպությունների ղեկավարների, ինչպես նաեւ լայն հասարակության հետ, նպատակ ունենալով Արցախի կենսական մի շարք ծրագրերի համար նյութական միջոցներ հայթայթել։
Այդ ծրագրերի մեջ առաջին տեղերը գրավում են Ստեփանակերտում նոր, արդիական պոլիկլինիկա ստեղծելու եւ ԼՂՀ Հյուսիս-հարավ ճանապարհի կառուցումն ավարտելու առաջադրանքները։ Դիագնոստիկ կենտրոնով օժտված պոլիկլինիկայի համար արդեն իսկ հանգանակված է 1,6 մլն դոլար։ Պակասում է ընդամենը 400 հազար դոլարՙ ծրագիրն իրականացնելու համար։ Ինչ վերաբերում է Արցախի «ողնաշարը» համարվող 105 կմ երկարությամբ ճանապարհին, որի մոտավորապես կեսն արդեն կառուցված է, դեռեւս 13 մլն դոլարի կարիք կա ամբողջացնելու համար։ Հյուսիս-հարավ մայրուղին իրար է միացնելու Արցախի ավելի քան 100 բնակավայրերՙ գյուղեր ու քաղաքներ։